دنيا رديه مابقى فيها احد ماخان حتى التراب اللي عشقتة دفني ..!

صباااح الـورد
جمعة مباركه عليكم ..!
جيت قسم الأبداع وتذكرت كلام الدكتور ودعوته
لنا وانا متأكده ان كثير من اللي بالمنتدى مبدعين
لكن مخبين او بالأحرى مايحبون حد يطلع عليه

انا جايه مو عشان اكتب خاطره ولا شعر لا
جايه عشان اقولكم شي لطالما غاب عن اذهاننا
وهلحين اتركوني اتكلم بلا حدود ..

صار لي موقف هذا الأسبوع وتقريبأ اغلب اللي بالمنتدى يعرفون
وش صاير لي بالنسبه للمقررات اللي حذفوها الجامعة وصار
لي اسبوعين احاول يرجعونها لكن لاحظت ان اهتمامي كان
أقل من اهتمام خواتي وأمي من جد لما يسألوني وشسويتي
أحسهم خايفين ومهتمين اكثر مني وكأن هالشي لهم ومسستقبلهم
ولهذا فتحت هالموضوع ..

ومثل ماقالت ساره صحيح حنا مانعبر للأهل عن حبنا لأن هذا
شي فطري أول مافتحت عيوني على هالدنيا كانت أمي اول
انسانه اشوفها وتعلقت فيها وحبيتها ولما تبعد عني أبكي ولهلحين
ناااس كثير احبهم لكن في بعدهم تعودت لكن أمي ماتوقع اقدر يوم
اعيش بدونها او ابتعد عنها ومـره قرأت نظريه ( أن الطفل الوليد يبكي
اذا امه ابتعدت عنه لكن لما تقترب من طفلها يسكت ونلاحظ عيال خواتنا
اذا اخذتهم امهم يسكتون وكأنهم يعرفون امهم وانا كمان اذا اخذتهم يسكتون
عندي يحسون بحنان المهم صاحب هالنظريه اقترح ان يبعد الطفل عن
أمه واذا بكا يجيب له لبس من ملابس الأم فيه ريحتها وطبعأ جربها وسكت الطفل
وكل ماحاول يبعد الملابس يبكي واذا قربهم يسكت الطفل وهذا دليل ان الطفل يعرف
أمه عن طريق رائحة ملابسها سبحان الله ) وهذا اكبر دليل على حب الطفل الفطريه
لـ أهلـه ..
غالبأ يسون لنا اهلنا اشياء مانحس فيها او نعتبرها واجب عليهم او مانقدرهم
ولانشكرهم ولو سوا لنا شخص غريب جميل نشكره ونحاول نرد جميله
رغم ان الاهل تضحي وتسهر على راحتنا
وما اعتقد أن في أنسان بالدنيا كلها يحبك اكثر من أهلك وحتى لو يحبك
مستحيل يقدم مصلحتك وسعادتك على سعادته ومصلحته و ماينلام ..
بخلاف الأهل تلاقي الأم والأب يتمنون يكون ابنائهم ناجحين وافضل منهم
يخافون عليك يراعون مشاعرك يهتمون فيك .. مواقف كثيره تصير لنا
مثلأ لو يمنعونا من اشياء وحنا نزعل ونعتبرهم مايحبونا وبعد فتره لما
تكبر تعرف أنهم منعوك من هالشي لمصلحتك وخايفين عليك بعكس الناس
تلاقيهم يساعدونك على الخطأ وانت تحسبهم يحبونك ويلبون طلباتك وهذا
شي واقعي لكن حنا نتجاهله ..
واعطيكم أمثله على كلامي ..
لو مثلأ اخوك منعك من شي او تحكم فيك حنا نعصب ونزعل
ونحسبه كرهـ او يبي يفرض شخصيته علينا وهو بلعكس هذه
( غيــره ) مو شرط الغيـرهـ تكون بين الحبيب وحبيبته كمان
فيه غيره من نوع ثاني غيرة الأخ على أخته يخاف عليها ما
يبي حد يتكلم عنها ولا يمسها بـ شي ..
لكن حنا يالبنات عمـرنا مافكرنا بهالشي يعني مانهتم او مانمنع
اخوانا من شي صحيح هذا شي طبيعي ان الرجال هو المتصرف
لكن المفروض مثل مالأخ يغار على أخته حتى الأخت تغار على
أخـوها ..
وخواتنا كمان حبهم لنا واهتمامهم فينا وقفاتهم معنا ومساندتنا بالحياة
مين أول شخص لما تحصل عندك مشكلة تروح له ..؟
مو أختك مو أخوك امك وابوك والناس اللي أنت تحبهم وقت اللي
تضيق فيك الدنيا ماتروح لهم ليش ..!
لأن هذا شي فطري دافع فينا نلجأ لأقرب الناس لنا لأن داخلنا شي
يحركنا اتجاه اهلنا وياااا كم لجئنا لناس حسبناهم سند طلعو مو كفو
وانا من جد اي شي اقل شي يصير لي دقيت على أختي وقلت لها
وكلهم يساعدوني ويوقفون معي والناس اللي حبيتها الآقيها بتعدت
عني .. وين الحب وين الصداقة وين الوفا يعني بمجرد ماتكون
مبسوط يشاركونك لكن بس تطيح وتحتاج سند تلاقيهم تخلو عنك

وما اقتصر كلامي على الأسره لا كمان الأهل كلهم ..
كثيرر منا تصير بينهم وبين اهاليهم مشاكل وتلاقيهم وقت
الفرح متفرقين اغلبهم لكن وقت الحزن والضيق يوقفو معك ..
لأنك وانت سعيد تقدر تشارك الكل بفرحتك لكن وقت الضيق والحزن
نااادر تلقى الكفوو اللي يوقف معك ويساندك وحتى لو قفوا معك كل هالناس
واهلك ماوقفو معك وربي ماراح تحس بقيمتك لأن الأهل شي أساسي هم سندك
بالدنيااا .. ومهما كانت مشاكل بينهم او غيره او حسد واختلاف آراء لكن ماتوصل
لدرجة الكره بلعكس الأهل اول من يخاف عليك ومايتمنى لك أي مكروه او مــوت

صار لي موقف
لما توفى ابوي طبعأ قبلها بليلة كنت اذاكر وسبحان الله قلبي
كان حاس تركت الكتاب فجأة وكان عندي بعد اسبوع اختبار
الوزاره ثانويه عامه ومن جد ماقدرت اذاكر أحس شي بيصير
وما رحت انام اتقلب مو قادره وغفيت يمكن ساعتين الا جا الصباح
وابوي طبعآ بالمستشفى واناعند امي بالغرفه .. المهم دق وصحيت
وردت امي بعدين انزلت تحت وهي ماتدري بنت خالتي جاتها لكن
انا مانمت وخايفة انزل حاسه في شي وفجأة جتني بنت خالتي الغرفه
وسلمت طبعآ استغربت ليش جايه وصاعده لي بالذات وقالت لي كلام
انتي مؤمنه ومدري ايش وقبل لاتكمل انا عرفت وقعدت أبكي وضمتني
المهم بعده بشهر ..
بالصباح جت بنت خالتي نفسها وبيتنا قريب جت مشي وهي صاحيه
من النوم متضايقة وجايه لأمي لأنها متعلقه فيها وبالطريق وهي تمشي
سمعت رجال يتكلمون يقولون شاب متوفي ولما جت بيتنا جلست وقالت
لأمي وقالت احس اني متضايقه ماعرفت انام وفجأة دق الجرس وكان
جاي ولدها البكر وقالها يمه تعالي البيت جدتي تبيك << يعني خالتي امها
وهي حست وسألته ليش أمي ماتجي بيتنا اكيد صاير شي
وقالت له خالد فيه شي ؟؟
قالها خالد مات وقعدت تبكي وووو
الله يرحمه ويسكنه فسيح جناته
واللي كنت ابي اوضحه في هالكلام كله
انها هي اللي جتنا تخبرنا بوفاة ابوي ونفس الشي جت برجليها الى
بيتنا بوفاة ولدها .. وسبحان الله وقت تتضايق تروح لناس تحبهم
وهي من جد تحب أأمي ..

ادري طولت عليكم بس من جد ماتحس بقيمة الشي الا اذا فقدته
وماراح تحسون بقيمة اللي يسون اهلكم ويضحون عشانكم الا لافقدتوهم
فـ أتمنى من الجميع يستغل الفرصه قبل فوات الأوان اعطوهم حقهم وتقديرهم
من الحب وموشرط الحب بالكلام حتى الفعل يدل على حبك لأن من جد محد
بهالدنيا يستاهل حبكم الأ اهلكم .. ومهما صار تبقى الأهل عزوتك وسندك
لو جار الزمن عليك والناس خوانه ...!

ولو خانتك الدنيا باللي فيها تأكد أن اهلك مستحيل يخونوك
او يتخلو عنك وقليل من تلقاة وفي بهالدنيا صادق ووافي
لكن الدنيا تبقى بخير مادام فيها ناس طيبه مثلكم ..




دنيا رديه مابقى حد فيها ماخان
حتى التراب اللي عشقتة دفني



ريمي