كـــــبـــــيـــــــنة الـــهــاتــــف

تحية صادقة تناسب جميع الاوقات والاذواق

(( موضوع لمن يعشقون القراءة بين السطور ))


منذ الصغر .. هناك في نفس المكان في زاوية المنزل الخارجيه ... تصدقون ما هي

زابطة بالفصحه ... خذوها على بساااااااطه

في دكه عند بيتنا من صغري وانا ضارب فيها طنب ... يعني اللي كان يبيني يدور

علي في الملعب او على الدكه ... المهم وبما اني معقد وكريه فكنت دائما جالس

لحالي .. وقدامي في الجهة الثانيه من الشارع ارض فاضيه

تفاجأت في يوم من الايام بخشبه صفرا مزروعه في هذه الارض الفاضيه حسيت

انها نقزت ..

خربت علي المنظر الروعه للطعس اللي قدامي

واللي كان قاهرني انها كاشخه بصفارها ما تدري ان شمسنا ما ترحم ..

ومالكم بالطويله هي اسبوعين وانكسرت شوكتها وطق لونها .. وانا اللي انسدح

عليها من الضحك

المهم مرت الايام وانا متربع على دكتي وهي منبته في نص البراحه و مقشره ..

بصراحه ... انكسر خاطري .. وصرت كل ما اجي اجلس اسلم عليها .. المهم في

يوم من الايام والقاها مكسوره .. الظاهر واحد من المنسمين رجع عليها بالغلط

وصفقها .. وانا اللي ينكسر خاطري اكثر عليها واقعد اواسيها واقول لها معليش ولا

يهمك بكره الايام تعطيك احسن من اللي خسرتيه

المهم اني رحت عمره اسبوع ورجعت والا الحبيبه منتصبه و صايره حديد يلق ولون

سموك سلفر .. احلى احلى يا سموك سلفر ... عطنا وجه يا ملمع

وهي اللي فعلا تضحك من تحت لتحت ... سبحان الله وكلها بعد ثلاث اسابيع والا

ذاك الجدار اللي مسند ظهرها ومظلل عليها ... قلت ايييه سبحان الله قبل كم يوم

كنت مكسوره ومقشره

والحين مسنوده وملمعه وعلى قولت الصوماليين ظل حيطه ولا ظل راجل ... الله

يدوم عليك

بس المهم لا تشوفين نفسك علي

وبعد ما كنت اكحل عيوني بالطعوس صار ما في قدامي الا كبينة الهاتف الفضيه

اتمقل فيها وهي تخز فيني ... وصرنا فاهمين لبعض

مثلا اذا شفت انها سايحه ومرتخيه عرفت ان ذيك البنت القطعه جالسه تتكلم

بالتلفون .. واذا شفتها تخض وتهتز كأنها خلاط قديم عرفت ان جارتنا الدبه متهاوشه مع رجلها

وجالسة تشكى لامها (( ما بحبوووووش يا مامي )) الله يرحم مامتك بس اذا انت

تقولين مامي

اجل جنيفر انستون وش تقول .. اهااا أووميياااا فديييتااااش

ما علينا ... واذا شفتها لايعه كبدها وتبي ترجع عرفت ان مستر شلاخ غاث وحده

لين ما طلللع ريحتها ومن كثر ما ملت وهي ترقع الخط في وجه قالت خلني اشوف

وش يبي هذا


وهات لك يا شلخ : انا بيت الوالد بالررريااااضض بووه حوشيين وحدييييقه ومواتر

كثييييره بالحييييل ... وكل ما جاء واحد من ربعي وضحكني قلت له دووك مفتاح

هالموتر هدييييه .. قسم بربي ما تردني

الله يرحم الحال وهو المسكين كل ما جاء يتصل على اهله بالديره ما يمديه

يدق 07

الا نط له السستم هذه الخدمه غير متاحة لك بالعربي سدد الاربع فواتير اللي

عليك وبعدين نفتح لك الصفر

والله مسكينه هالكبينه تشوف بلاوي ومتحمله وساكته ... بس الحمد لله يطيب

خاطرها وينشرح صدرها اذا اتصل امام المسجد على امييمته وجلس يتشفق عليها

ويطلب رضاها .. حبيب الله يخليه بس لو انه يسلم اذا مر .. يالله مو مشكله المهم لا

يطلع من حارتنا لا الله يبلانا بناس قرف مثل اللي كانوا برابع بيت على اليمين .. لا

صلاة ولا عبادة واخر الليل طقطقه وطرب (( هو بيني وبينكم وناسه .. لكن كل ليله

صعبه شوي ))

المهم انا وذا الكبينة عشنا قصة جميله .. شفت تطوراتها وهي تكبر ... مثلها مثل أي

بنت ... من يوم ما كانت لوح منبت بالطعس لين ما كبرت وربربت وصارت حديد و

مزهططة بلون سموك سلفر وصار لها جدار تنسند عليه و يظلل عليها ويحميها من

المنسمين لا يصقعونها

هي تحكي لي وانا افهمها من غير ما تتكلم او اسمعها (( يا عيني على الشعر ))

ومرت الايام و انا خفت رجلي عن الدكه .... بس بعد مده جلست على الدكه والا ذا

الكبينه اللي فاقعه من الضحك .. سلالالالالالالالالاماااااات

وانا اللي بغيت اقوم افقع وجهها افكرها حافلتها فيني

وش فيك يالهبلة ... قالت الله يرحم ايام الدبه ومستر شلاخ طحنا ببزارين ما غير

طايحين بذا النت وشات ومنتديات ومافي الا هاهاها..... كي كي كي ولا منطق ولا

مضمون

اقول بس يا حسافة وايراتي اللي راحت بالمسخره وقلت الحيا

وهنا نوصل الى زبدة الموضوع اخواني القراء انه عشان خاطر خويتي الكبينةاتمنى

انكم لما تردون على المواضيع تكون ردودكم هادفة وبنائة كما هي دائما حتى لا

تكونون سببا في هبال هذه الكبينة المسكينه .. والاهم انكم تردوون عشان

تشاركون الكتاب بافكارهم وجهودهم .. كنوع من التشجيع والشكر .. لان المنتدى

ليس فقط لطرح المواضيع .. ولكن بعد للمشاركه في الافكار

ما ني قايل انتهى عشان ما يزعلون بعض الناس .. لكن بسوي مثل حركة

مسلسل سانشييرو

>)ّّّّ/""؛

بالعربي يتبع

تحية عطـــرةأستاااذي الدكتور

كثير افكار جات ببالي ولا عرفت اللي ودك توصله للقارئ بالضبط..

يعني هو وضع معين مو عاجبك وودك انه يتغير؟

او فكرة ان الشي اذا تطور هذا مايعني انه صار افضل ؟

احترت والله


اسلوب الكتابه متسلسل ومشوق وجدا مبدع وراقي

مع ان الغموض قد يعتبر ميزه خصوصا اذا كان فعلا يوجد فكره ومغزى من الموضوع وهذا ما لا اشك فيه استاذي

بس ودي افههم